【#玉石101】

講起象，大家可能會諗起泰國，但其實中國歷史好早就出現過大笨象，而且一啲都唔笨，商代文物就已經出現象牙製物，甚至現身喺青銅器同玉器上面。當然，就同好多動物又或者神話生物一樣，能夠流傳到依家，依然有人用嚟做玉器嘅動物，一定唔少得好意頭。象自古喺中華文化代表純良，亦隨住佛教傳入中國，作為普賢菩薩座騎嘅大象自然有咗吉祥嘅象徵，再加上「象」同「祥」嘅諧音，象形玉器就多咗一份太平同吉祥嘅意義。