【#玉石101 】

「龍」係其中一種常見嘅玉石造形，特別係古代，形態源自古代人對風雨等自然現象嘅想像，所以龍亦俾人深不可測，甚至係殘忍嘅印象，龍形玉器經常作為祭祀用品。不過隨住朝代轉變，龍加入愈嚟愈多唔同動物嘅特徵，再慢慢演變成封建社會皇帝權力嘅象徵，最多人知道就係龍袍上嘅五爪金龍。時至今日，玉器上嘅龍好多時都係取其騰空上升嘅生猛姿態，有望子成龍、身體健康意思，又或者作為生肖象徵咁佩戴。