【#玉石101】

「馬騮」其實同馬冇關，只由猴子古代讀音演變而成，但玉器上面，馬同猴子原來經常會同場出現。馬喺好耐之前已經加入人類社會，商代已經有馬嘅玉雕出現。唔同品種嘅馬，能力可以異天共地，喺中華文化入面，駿馬一直代表人才、飛黃騰達等意思。尤其到咗清代，馬因為自古就係滿族游牧同射獵嘅好拍檔，深得皇室喜愛，出產唔少馬匹造型嘅工藝品，臥馬玉雕就係最常見嘅一種。至於猴子騎住馬嘅玉雕係咩意思？答案就係「馬上封侯」，同樣有升職同出人頭地嘅喻意。