【#玉石101】

青金石，多數為深藍色，因為入面經常混入咗黃鐵礦或方鈉石嘅礦物，有時會帶有金色或白色的斑點或條紋，成為自古以來非常特別嘅寶石，由古代埃及到美索不達米亞，好多皇室成員、貴族都會用嚟製作飾物同護身符，慢慢就成為咗權力、智慧和神聖嘅象徵。

以前青金石仲會用嚟提煉一種命名為「群青」嘅藍色，用嚟製作藝術品，敦煌莫高窟啲壁畫，以至名作《戴珍珠耳環的少女》入面都有用到青金石提煉嘅藍色。青金石價值本身已經高，將寶石研磨、浸洗、提取後嘅顏料價值可以等同黃金。不過而家市面真貨青金石好少，想自己入手的話，好大機會買到假嘢㗎！