【#玉石101】

翡翠同和田玉係市場上最常見嘅玉石，但要數玉嘅種類，其實仲有好多好多。中國自己就有四大名玉：和田玉、獨山玉、岫玉、藍田玉。今次就同大家講下早喺新石器時代已經喺河南省南陽市郊獨山出產嘅「獨山玉」。

獨山玉又叫做「南陽玉」或者「獨玉」，硬度為6.0至6.5，部分更達到接近翡翠嘅7級，所以又有人叫佢做「南陽翡翠」。不過獨山玉唔似翡翠呈現纖維交織嘅結構，佢通常為粒狀結構，而且非常有性格，礦石色彩豐富、濃淡分佈不均，經常因為不同礦物組合而出現多種顏色並存嘅現象，考驗玉石師傅功夫，但同樣容易創作出巧奪天工嘅作品，就好似圖中玉器完美表現竹筍、昆蟲同背景嘅分層同深度。