【#玉石101】

玉器當然唔止用動物做圖飾，也包括好多幻想或者傳說嘅生物，其中一種最常見，唔少生意人都好鍾意佩戴嘅，就係瑞獸「貔貅」。相傳貔貅曾經係軒轅黃帝麾下猛獸，更助黃帝打敗炎帝，非常兇猛，喺古代經常用作鎮墓獸，或者辟邪裝飾。咁點解嚟到現代又變成「財運」嘅象徵？原來傳貔貅有口無肛，食嘢有入冇出，真係諗起都痛苦，但民間偏偏就將依種特性演變成「招財」同「聚財」嘅象徵，甚至有種講法，指頭同身體平行筆直嘅貔貅代表正財，頭歪歪嘅貔貅就代表偏財。唔知大家又有冇聽過貔貅唔同嘅故仔同寓意呢？