【#玉石101】

叫得「米黃玉」就實係玉？其實嚴格嚟講佢只係大理石，唔算係真玉。因為產量大，價錢平，通常由幾十蚊都有交易，都算係一種常見嘅首飾玉石。米黃玉以黃色為主，常見紋色有兩種：淺黃似小米嘅「小米黃」，同埋帶白色條紋嘅「閃電黃」。

米黃玉通常係不透明到半透明，質地脆，硬度大概4.3至4.5，好易崩口或裂開，質感可以好粗糙，亦都有啲好細緻順滑，所以入手平價貨，都要小心選擇呀～

另外，好多人會將「米黃玉」叫成「黃玉」，事實上新疆真係有出產黃玉，但屬於軟玉，不過早就近乎絕跡，所以價值甚至唔輸畀羊脂玉。所以如果有人話畀你聽眼前嘅係黃玉，價錢又出奇咁平，就要提高警覺啦！