【#玉石101】

玉器喺中華文化入面有多重意涵，其中一樣係保平安。依種玉石文化原來已經有好遠久嘅歷史，喺中國出土嘅六、七千年前古物當中，可以見到玉石由工具石材，慢慢演變成祭神嘅禮器，而先秦古籍《山海經》入面已經有記載玉器用嚟做日常配飾，抵抗不祥之事：「君子服之，以御不祥」時至今日，玉器喺華人社會入面，依然係一種保平安同象徵吉祥嘅重要信物，除咗雕刻成佛像、觀音、雲紋、蝙蝠，就算只係普通嘅圓形吊墜，都已經充滿咗祝福嘅喻意。