【#玉石101】

唔少人都擁有一兩件水晶，但嚴格嚟講，佢唔算「玉」，因為玉石多數由幾種唔同嘅礦物組成，而水晶就只係單一礦物晶體，所以多數都歸類做「寶石」。不過如果用中國傳統文化嘅角度嚟睇，水晶早喺新石器時代已經當成玉石使用製作飾物，最出名就係凌家灘遺址出土距今5000幾年嘅水晶耳璫，而相中嘅就係清代嘅水晶筆架。講起水晶最特別嘅地方，除咗佢嘅透光度，市面仲有大量生產人造水晶，而且可能仲貴過天然水晶，Swarovski就係其中一個人造水晶精品品牌代表。