【#玉石101】

今次講嘅岫玉，一樣係中國四大名玉之一，喺遼寧嘅岫岩出產，所以又叫岫岩玉。入選得四大名玉，緊係有佢嘅過人之處：色澤晶瑩，通透又冰涼，睇落去好水靈又純淨，可惜嘅係⋯⋯岫玉石質偏軟，成品雖然非常好睇，但市場價值一般。

不過，岫玉嘅美麗喺古背已經被世人發現，早喺紅山文化時期就已經用嚟製作玉器，包括有名嘅「玉豬龍」，到戰國嘅獸形玉、漢朝嘅辟邪，直至清代嘅哪吒玉仙，每一代都可以搵到岫玉做嘅代表作。岫玉雖然唔算得上名貴，但係中國玉文化入面不可或缺嘅一員！