【#玉石101 白菜都有觀賞用？】

上星期講到一塊玉可以有唔同顏色嘅組合（bit.ly/JO240713），工匠會巧妙咁利用顏色結構創造幾可亂真、令人激賞嘅作品。歷史上最為人熟識嘅傑作，就要數現藏台灣國立故宮博物院嘅「翠玉白菜」：玉身分為綠色和白色部分，分別雕刻成綠色菜葉同白色葉柄，紋理細緻，唯肖唯妙，菜葉上仲有一隻蝗蟲同一隻蟈蟈，令成件作品更有生命力，難怪成為博物院最受歡迎藏品之一。

「翠玉白菜」係清朝光緒帝瑾妃嘅嫁妝，白色菜身象徵女方「身家清白」，昆蟲就有「多子多孫」嘅寓意。但原來世上最少有6棵玉白菜，大小不一，形象各異。

講咗咁多，咁究竟依棵菜幾錢？2018年「翠玉白菜」要稍移「玉」步去台中展出，當時博物院曾經公開為展出同運送嘅保險招標，並公開咗依棵白菜估價為5.5億新台幣（約1.31億港元），史上最貴白菜果然並非浪得虛名。