【#玉石101】

今日再同大家分享另一種成日畀人用嚟扮高檔玉嘅「卡瓦石」，佢價錢好平，有時一個手鐲十幾蚊就有交易，但如果扮成白玉，就隨時買貴好幾十倍！

卡瓦石喺新疆出產，雖然驟眼睇有啲似和田白玉，但成分其實較接近蛇紋石，硬度低、質地軟、密度又細。不過，你話係咪好難分辨，其實又唔係。因為卡瓦石硬度低，細心睇表面好容易有花痕；另外由於佢密度低，冇白玉沉甸甸嘅手感；而且佢表面比較多細坑，雖然眼睛未必睇得到，但望落冇玉石嘅溫潤感，質地較粗。