【#玉石101】

玉器喺中國文化有幾重要？睇下杭州依座最新嘅藝文地標就知道。啟用近兩個月嘅「玉湖美術館」，睇落有種玉器獨有嘅剔透感，原因係建築設計團隊用咗具玉石質感嘅玻璃，喺唔同嘅光線之下都會散發出溫潤的光澤。莫比烏斯環嘅形狀，就參考咗古代六器之首用作禮天嘅「玉璧」，設計成雙環相嵌嘅形態，同距今四千多年前已經孕育出豐富玉器藝術嘅良渚文化互相對話，絕對係一件世界級「玉器」！