【#玉石101 咩係「養玉」】

 

成日話 「人養玉，玉養人」，玉石會愈戴愈綠，究竟係心理作用，定係有科學根據？

 

平時見到嘅玉石多數都打磨得好光滑，但其實表面有好多孔洞同裂縫，所以玉石出廠或加工後，好多都會上一層蠟，填補凹陷嘅地方，令玉器更有光澤。而且蠟亦可以幫玉石保濕，令佢長時間保持水潤光澤，所以大家見到玉器展示櫃入面都會放一小杯水用嚟保濕。

 

同樣道理，人體分泌嘅油脂一樣可以填補玉石面表嘅裂縫，情況就好似用粉底液遮蓋皮膚嘅毛孔，令皮膚睇起上嚟更光滑同亮澤。不過，蠟同油脂都會隨時間慢慢減少，但只要經常戴吓佢哋，就可以做到天然保養。所以「日日戴嘅玉靚啲」絕對係有科學根據㗎！