買玉器時，相信大家都有聽過A貨、B貨、C貨，甚至係AB貨同B+C貨，但你又知唔知英文字母背後係咩意思？先講A貨，A有「All Nature」嘅意思，指未經過化學處理同破壞嘅天然玉石（以無色蠟保護玉器或拋光處理則不屬於化學處理）。

B貨又或者B玉，就係經過化學劑或強酸浸泡，目的係去除玉石中嘅雜質，然後再注入樹脂類填塞物填補雜質嘅空隙。雖然B玉嘅處理冇改變玉器顏色，但改變玉石結構嘅過程可能已經大大降低咗礦石嘅硬度，除了比A貨易碎，日子耐咗仲可能會愈戴愈黃。而且A玉同B玉嘅價格仲可以相差10倍或以上，B玉亦可以話係冇收藏價值可言。

今日講住咁多先，下次再同大家講下咩係C玉同B+C玉。